សមាគមសារព័ត៌មានសុក្រឹត សាខាខេត្តបាត់ដំបង បាននាំយកអំណោយមនុស្សធម៌ផ្តល់ជូនគ្រួសារចាស់ជរា មានជីវភាពខ្វះខាតចំនួន០៣គ្រួសារ នៅស្រុកបវេល

(ខេត្តបាត់ដំបង)៖ នៅរសៀលថ្ងៃសៅរ៍ ៩កើត ខែពិសាខ ឆ្នាំរោង ឆស័ក ពុទ្ធសករាជ២៥៦៨ ត្រូវនិងថ្ងៃទី១៥ ខែមិថុនា ឆ្នាំ២០២៤នេះ លោក សុីម វិសាល ប្រធានសមាគមសារព័ត៌មានសុក្រឹតសាខាខេត្តបាត់ដំបង និងសហការី ដោយមានការចូលរួមពីលោកមេភូមិទាំងបីភូមិ ចុះនាំយកអំណោយមូលនិធិមនុស្សធម៌របស់សមាគមសារព័ត៌មានសុក្រឹត និងសប្បុរសជន ដែលមានអ្នកស្រី ហង្ស ចន្ថា បានផ្តល់ជូនគ្រួសារជនចាស់ជរា មានជីវភាពខ្វះខាតចំនួន០៣គ្រួសារ នៅក្នុងឃុំខ្នាចរមាស ស្រុកបវេល ខេត្តបាត់ដំបង។

លោក ស៊ីម វិសាល ប្រធានសមាគមសារព័ត៌មានសុក្រឹត សាខាខេត្តបាត់ដំបង បានបញ្ជាក់ថា គ្រួសារជនចាស់ជរា មានជីវភាពខ្វះខាតទាំងបីគ្រួសារខាងលើរួមមាន! /លោកយាយ ទិត្យ សម័យ អាយុ ៨៣ឆ្នាំ រស់នៅភូមិខ្នាចរមាស ឃុំខ្នាចរមាស ស្រុកបវេល /លោកតា កឹង ម៉ៅ អាយុ៧៨ឆ្នាំ និងប្រពន្ធឈ្មោះ ខ្មែត សារឿន អាយុ៧២ឆ្នាំ រស់នៅភូមិកោះរាម ឃុំខ្នាចរមាស ស្រុកបវេល /លោកយាយ សាប សារិន អាយុ៨១ឆ្នាំ រស់នៅភូមិព្រៃសង្ហា ឃុំខ្នាចរមាស ស្រុកបវេល ខេត្តបាត់ដំបង ដែលក្នុងមួយគ្រួសារៗទទួលបាន ,ទឹកផ្លែឈើ០១កេះ ,មី០១កេះ ,អង្ករ២៥កីឡូក្រាម ,ទឹកសុទ្ធ០៥យួរ ,ទឹកត្រី០១យួរ ,ទឹកស៊ីអ៊ីវ០២យួរ ,និងថវិកាចំនួន ៥០០០០រៀល។

ក្នុងឱកាសនោះដែរ លោក សុីម វិសាល ប្រធានសមាគមសារព័ត៌មានសុក្រឹតសាខាខេត្តបាត់ដំបង បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់លោក នួន នី ប្រធានសមាគមសារព័ត៌មានសុក្រឹត ទៅកាន់លោកយាយ លោកតា ដោយបង្ហាញពីការគិតគូរពីជីវភាពរស់នៅ និងក្តីអាណិតអាសូរ ពិសេសផ្តាំផ្ញើអោយលោកយាយ លោកតា ថែទាំសុខភាព ដោយពិសារទឹកដាំពុះល្អ សម្រាកក្នុងមុង និងសូមប្រុងប្រយ័ត្ននៅពេលមេឃធ្លាក់ភ្លៀង ព្រោះវាអាចមានផ្គររន្ទះ និងខ្យល់កន្ត្រាក់កើតឡើង។

ជាកិច្ចឆ្លើយតប បន្ទាប់ពីទទួលបានការឧបត្ថម្ភរួចមក ក្រុមគ្រួសារលោកយាយ លោកតា ខាងលើ ក៏បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះក្រុមការងារសមាគមសារព័ត៌មានសុក្រឹត ដែលមានលោក នួន នី ជាប្រធាន បានយកចិត្តទុកដាក់គិតគូរពីជីវភាពរស់នៅរបស់ពួកគាត់ដែលកំពុងជួបការលំបាកខ្វះខាត និងសូមជូនពរអោយក្រុមការងាររបស់សមាគមសារព័ត៌មានសុក្រឹតទាំងអស់ ប្រកបដោយសេចក្តីសុខ សេចក្តីចំរើន ទៅទីណាកន្លែងសូមអោយមានសុវត្ថិភាព និងជោគជ័យគ្រប់កិច្ចការងារ។